لا يابيه انا بشتغل كمبارس علي عربيه كارو….

بجوار محطة مصر بالاسكندرية وفي أول النبي دانيال هناك مقهي يقال له (قهوه النقاشين) يجلس العمال هناك في انتظار صاحب عمل في احتياج لعمال يلتقطهم من هناك…جلس هناك شاب وسيم من ملامحه ابن ناس ومتعلم يقال له المهندس سميح…ذهبت هناك للبحث عن عمال للشركة وتصادف ان جلست بجواره وشربت قهوه الصباح معه وتجاذبنا اطراف الحديث

 

-         مش معقول انت مهندس وبتشتغل نقاش

 

-         لا يا استاذنا انا بشتغل حاجه تاني

 

-         بتشتغل ايه بقي يا باشمهندس

 

صمت المهندس سميح وتردد قليلا

 

-  مالك يا باشمهندس؟

 

تظاهر بانه يشرب القهوة وحاول الهروب من سؤالي مما زاد من فضولي وسالته مرة اخري

-  ياباشمهندس انت بتشتغل ايه؟ انت مكسوف؟ الشغل مش عيب يمكن نحتاجك في شركتنا

 

-  اهو بلقط رزقي يااستاذنا والسلام

 

-  بتعمل ايه يعني…نقاش …سواق…كهربائي… ما تقول ياعم

 

-  انا بشتغل كومبرس

 

-  طيب ياعم دي شغلانه حلوه ممكن حد يكتشفك وتبقي ممثل كبير في المستقبل

 

-  لا يابيه انا بشتغل كمبارس علي عربيه كارو

 

لم افهم كلامه جيدا وراجعت كلامه مره اخري……كمبارس فين؟ علي عربيه كارو؟؟ يعني ايه؟

 

لاول مره اراه يضحك وظهرت اسنانه البيضاء

 

-  ياعم انت بتقول الغاز ولا بتهزر معايا

 

-  لا انا مش بهزر انا فعلا كل يوم اقف علي عربيه كارو وأمثل

 

-  ازاي؟

 

-  انت مش بتشوف عربيات عليها زحمه وناس كتير واقفه تصرخ

 

-  تصرخ ازاي يعني

 

-  بنعمل مزاد علي بضايع في الشارع وانا بساعد صاحب المزاد وأرفع السعر يعني كده وكده تمثيل وحركات

 

ابتديت افهم لاني بالفعل شاهدت مزادات غريبة في شارع النبي دانيال ومحرم بك ومحطة مصر ولم افهم جيدا ما يدور وكنت دائما أتعجب من أصواتهم والاهتمام الغريب بشراء تمثال او عروسة خشب او راديو صغير

 

-  يعني يا باشمهندس الناس اللي بترفع السعر دي كلها كمبارس؟

 

-  أغلبهم

 

-  امال مين بيشتري

 

-  بسبب الازدحام والاثاره في ناس تقف تتفرج وساعات حد يدخل المزاد ويرفع السعر وطبعا كلنا اسماء وهميه بنسكت والبيه بيشرب البضاعة …وساعات نقعد نزود علي بعضنا طول اليوم ولا نبيع قطعة واحده وتاني يوم نلاقي صاحب الشغل زود عدد المشاركين الوهميين لاقناع الناس ان هناك مزاد حقيقي واثاره….كل مازاد عدد المشاركين الوهميين زادت فرص اصطياد فريسة جديدة

 

-  طيب يا باشمهندس مفيش حد اكتشف الخدعه دي وعمل مشكله؟

 

-  ييييييييي كتير وتقوم خناقه ويرمي البضاعه في وش صاحب المزاد

 

-  طيب وانت مش خايف حد يكشفك؟

 

-  هيكشفوني ازاي يا استاذنا حتي لو حصلت كبسه اشتري تمثال وأمشي وأرجعه تاني يوم وخلصنا

 

-  وضميرك مش بينقح عليك يا باشمهندس؟

 

-  اكل العيش يا استاذ يعني هو انا كنت نفعت في حاجه تاني وقبلت اقف كمبارس علي عربيه كارو

 

-  اقولك ايه بس ربنا يوفقك ويفتح ليك طريق تاني

 

انتهي الحوار ودفعت الحساب وفي طريقي للسياره سمعت صوت عالي وضوضاء في أول الشارع:

فتحنا المزاد بالصلاة علي النبي….حمار خشب سن فيل لوكس تقفيل انجليزي…. مين يزود……عشرين…..خمسين ايوه مين معايا أيوه يابيه….ستين دفع بلدينا ابو جلابيه خضرا ورا…مبروك عليك الحمار الخشب

 

 

 

 

 

تقاطع شارعي صفية زغلول و سعد زغلول في محطة الرمل

 

الإسكندرية تعتبر العاصمة الثانية لمصر وأكبر مدنها بعد العاصمة القاهرة تقع على البحر المتوسط على امتداد 32 كم. وبها أكبر ميناء في مصر و هو ميناء الأسكندرية . يبلغ عدد سكانها أكثر من 3700000 نسمة . أسسها الإسكندر الأكبر 333 ق.م، فغدت مركزًا للثقافة العالمية. اشتهرت عبر التاريخ بمكتبة الإسكندرية الغنية التي أثرت الثقافة الإنسانية واشتهرت أيضا بمدرستها اللاهوتية والفلسفية . شيد البطالمة منارة الإسكندرية، والتي اعتبرت من عجائب الدنيا السبع، وذلك لارتفاعها الهائل (حوالي 35 مترًا). ظلت هذه المنارة قائمة حتى دمرها زلزال شديد سنة 1307م. وحديثاً، بُني في الإسكندرية مكتبة الإسكندرية الجديدة في العام 2001.