…………………..

…………………..

كان والدي الله يرحمه يشغل منصب حساس وهو التفتيش علي مخازن الجامعة وكشف التلاعب في العهدة ومراقبة موظفي هذه المخازن والمسئولين عن ملايين الجنيهات. هذا المنصب كان يجعل والدي مشدود الاعصاب دائما…حريص…جاد جدا وقاسي في كلامه…أي كلمه غلط أو أي تصرف مشبوه قد يؤدي الي مسؤلية كبيرة أوكارثة…..مخازن الجامعة كانت تحتوي علي كنوز حقيقية رأيتها بعيني عندما كان والدي يصطحبني معه للعمل, وسائل تعليمية , مواد كيماوية, مواد طبية وتشريحية والعديد من المراجع الاثرية والتماثيل.

والدي كالعديد من موظفي الحكومة في المراكز القيادية يكون عنده فراش (عامل) ….يعمل القهوة..يفتح الباب…ينظف المكان وهكذا. هذا الفراش كان غريب في كل شئ شكلا وموضوعا. لو بدأنا باسمه سنجد اسمه أغرب من الغرابة نفسها, كان أسمه الرئيس…الفراش أسمه الرئيس…أو الريس بالعامية..ننده له ياعم الرئيس هات قهوه…ياعم الرئيس ليه مافضيتش الزبالة.

 وجهه خليط من الملامح المصرية القديمة بتفاصيلها العميقة مختلطة بعيون خضراء وشعر ناعم.

كان طويل جدا يقترب من المترين…جسم ممشوق رياضي……العجيب انه دائما كان يلبس جلابية نظيفة جديدة مكوية وكوفية ملونه شيك جدا…كان يمشي بعزة نفس غريبة رافع راسه لفوق.

كان يأتي للعمل صباحا راكبآ دراجة عالية كبيرة من بتوع زمان…..لاتخطئ شكله من علي بعد كليومتر بقامته الطويلة وجلابيته الصوف المكوية …عالي فوق الدراجة.

لم أكن افهم لماذا والدي الله يرحمه كان يحبه جدا لدرجه انه كان يجلس معه يتكلم معه كصديق حتي انه كان احيانا يزوره في بيته…كان لغز لم افهمه.

مرتب الفراش هيكون كام يعني من ثلاثين سنة…..خمسين جنيه؟ لا اعرف……ولكن اللي اعرفه واشهد عليه ان هذا الرجل لم يكن يقبل علي نفسه حد يديله ربع جنيه بقشيش… وكان أمين جدا لدرجة اننا كنا نترك معه مفتاح منزلنا الكبير بثقة كامله….لم يقبل أبدا علي كرامته أي عمل اضافي في أي بيت ولم يغسل عربية أحد ……غريب

لم أهتم كثيرا بهذا الرجل في البداية الي ان توالت القنابل المذهلة…..عرفت بطريق الصدفة أن هذا الرجل عنده عشر اولاد…عشر أولاد بدون حسد….

عشر أولاد في المدارس والصغار منهم في مدارس النوتردام الخاصة….مستحيل …..هيجيب فلوس منين…كنت أسير مع والدي مره وشاور لي علي منزل عم الرئيس…..شقتين مفتوحين علي بعض في منطقه شعبيه عاديه مثل أي موظف او مواطن مصري

انا لازم أعرف الراجل ده ايه حكايته بالضبط…….بدأت التحريات…..عرفت ان الرجل يكسب مبلغ مش بطال من تجارة الجلاليب الفلاحي ويسافر كل اسبوع الي بلد اخري يحضر الجلاليب والكوفيات والطواقي وخلافه وبيعها ويكسب.

عرفت ايضا انه يأخذ أجازات عدة مرات في السنة ويذهب للموالد والمناسبات الكبيرة في الاديرة والكنائس ويبيع هذه الملابس والطواقي…عرفت ان والدي كان يساعده في اعتماد هذه الاجازات ويشجعه….اذا الرجل يكسب بعرق جبينه وأسس عائلة كبيرة مبنية علي الشرف والامانة. كان أولاده يعملون في الاجازة الصيفية لمساعدة الوالد في المصاريف

هذه المعلومات أشبعت فضولي ونسيت الموضوع الي أن مرت السنوات ودخلت بدوري نفس الجامعة وطبعا كان لي سند محترم من والدي المسؤل الكبير ……والمفاجأة اللطيفة أن بنت الريس كان زميلتي في نفس الكلية ونفس السكشن….طبعا كان عندي فضول أراقب بنت الرئيس….وجائت القنبلة التالية..وجدت أمامي طالبة جامعية علي درجة عالية من الشياكة والجمال..الشعر الاسود الامع الطويل.الملابس المنتقاه بعناية .التناسق في الالوان….الكعب العالي….نظاره شمس ريبان……دي مش بنت فراش أبدا …..لما كانت تشوف أبوها في الجامعة كانت تجري عليه تبوس ايده باحترام وحب شديد……..مصاريف الجامعة  كبيرة….كتب ومراجع …..كان نفسي أقدم المساعدة لهذه الفتاة المعتزة بنفسها ولكن طريقتها واسلوبها في الكلام خلاني اصرف النظر تماماااااا….دي شكلها زي ماتكون بنت برنس مش بنت فراش……سألت والدي لو كان بامكاني أساعد هذه الفتاة اللطيفة فابتسم بهدوء فيه قليل من الخبث الواضح وقالي متشغلش بالك هي عندها كل اللي عندك.

عندها كل اللي عندك……رنت الكلمة في دماغي….يعني ايه عندها كل اللي عندك……كل ما أوصل لطريق مسدود اجد الحل الوحيد في الجلاليب….أكيد الراجل ده ناجح جدا في تجارة الجلاليب لذلك عنده دخل مرعب ليغطي مصاريف الملابس والنظارات والجامعات والمدارس لعشر أولاد.

 

كان الكلام مع بنت الرئيس ممتع حقيقة وأصبحنا أصدقاء لانها كانت تتمتع بهدوء جميل وأخلاق وجمال لايقاوم….. كانت أكبر اخواتها وذلك أكسبها نضوج لانها اشتركت في تربية الأطفال, والدتها بالطبع لاتلحق علي عشر اولاد…..للاسف الشديد كان دائما يحوم في الأفق شبح أن والدها فراش في مكتب أبي ولكن بسبب اسلوبها الراقي جدا وشياكتها في الملابس أستطعنا التغلب علي هذا الشبح المرعب.

 

مرت الأيام وتوفي والدي في العمل بالذبحة الصدرية وشاله عم الريس علي يديه في المكتب وعلي اكتافه في الجنازة وبقي معنا لا يفارقنا طول فتره الحزن وكان يبكي بحرقة شديدة ملفتة للنظر في مرارة واضحة……..سألوه الناس مالك يا عم الريس مش كده يارجل خليك قوي شويه…..كشف عم الريس السر الذي كنا نبحث عنه سنوات ………والدي هو من أقترح عليه تجارة الجلاليب من نصف قرن وساعده برأس المال والمعارف والتجار……وقال له انا مش هديك فلوس بس هديك اول الخيط….انت عندك عيال…..أوعي تمد ايدك لحد…أشتغل بعرق جبينك….ارفع راسك لفوق …..اول دفعه جلاليب من عندي هديه….وريني شطارتك.

 

برضه مكنتش مقتنع ….جلاليب ايه دي اللي تصرف علي عشر عيال في النوتردام والجامعه……مش مقتنع ياناس.

 

في أربعين والدي لقينا راجل فلاح داخل مبتسم…..نظرنا له باستغراب يعني ايه لزمه الابتسام في الجنازة….بعد شويه لقينا الراجل ابتدا يضحك….قمت ناظرا له شذرا وقلت ياريت تضحكنا معاك يا معلم….نظر لي وهو يضحك وقال:

- متزعلش مني ياابني بس أفتكرت والدك وهو مخبي الفلوس في ايديه ورا ضهره زي الحرامية وساعات في الشراب ههههههههه

- فلوس ايه يا راجل انت سكران ولا ايه ما تحترم نفسك

- حلمك علي شويه ياسي متجلي هحكيلك اهدا شويه يا ابني انا قريبكم من البلد وصديق المرحوم

- اللهم طولك ياروح اتفضل احكي لما نشوف أخرتها

- أبوك يا ابني كان يبعتني أشتري كل الجلاليب الزايده مع الريس وكل مره كان الريس يزود الدفعه وابوك يدفع وهو مخبي الفلوس  ههههههههههههههههه

 زاد الرجل في الضحك ونحن المستمعين صمتنا كأن علي رؤوسنا الطير

- وناخد الجلاليب نبيعها للريس تاني بنص السعر والعدد زاد والريس يشتري أكتر وأبوك يدفع أكترولما مقدرش يدفع المبالغ الكبيرة دي جاب زملائه يشتروا كمان وزملائه عجبتهم الفكرة وكل موظف جاب واحد غلبان وخلاه يبع جلاليب وطواقي وسبح وشباشب وشرابات وملايات سرير هههههههههههههههههههههه

- أبوك يا ابني عمل وزاره شئون اجتماعية لرعاية الفقراء دون أن يدري ودون أن يقصد

الريس كان واقف بعيد يسمع الحوار…..ولأول مره في حياتي أشوف الريس يتهاوي ويسقط علي الأرض باكيآ في نحيب وحرقة جعلت كل من في القاعة يبكي…انهار الرئيس تماما أمام كشف هذه الحقائق بعد كل هذه السنوات.

فجأه فهمت لغز آخر….. جدي الله يرحمه كان كل ما يشوفني كان يقول يا متجلي متنساش الحسنة المخفية…..الحسنة المخفية يا متجلي

فهمت ليه جدي كان يشتري قفص البرتقال كله من البياع الغلبان……الحسنة المخفية

 الحيوان الذي كشف السر وفضح الرئيس وأعلن سر والدي كان السبب أني مقدرتش اكلم بنت الريس تاني ولا هي قدرت ترفع عينيها في عيني تاني…….أبحث عن هذا الغبي من ثلاثين سنة….حيوان

 

 

 

 …………

كل كتاباتي من ارض الواقع من قصص حقيقية عشتها …. قد أخفي بعض الأسماء والحقائق للمحافظة علي خصوصيات الناس فقط